王一博《人魚》女主誕生？將由黃磊18歲女兒飾演

內地頂流小生王一博，將出演由電影《無名》導演程耳執導嘅《人魚》，不過就因女主角人選未定，早前亦一度傳出將由趙麗穎出演嘅傳聞，而隨着被證實係粉絲P圖嘅假消息後，日前又再傳出《人魚》女主角，將由內地演員黃磊及孫莉嘅女兒黃多多出演，雖然2人合作尚未被證實，但已喺內地社交網掀起討論熱潮。

事實上，星二代黃多多（本名：黃憶慈）曾同爸爸黃磊出演過《爸爸去哪兒》，並以懂心、貼心及好家教人設成功入屋，備受好評嘅佢亦被網友封為「國民女兒」，如今18歲嘅佢更係長得亭亭玉立，有着亮麗外形及苗條身材外，清新嘅文青氣質亦令佢喺眾多星二代成功搶Fo之餘，更曾出演台灣知名舞台劇賴聲川嘅舞台劇，精湛嘅演技亦令佢圈粉無數。可惜人紅自然是非多，身為星二代嘅佢早前亦多次因為化妝、穿耳及衣着風格飽受外界抨擊，甚至仲被傳出詆毀聲譽嘅不實謠言，令媽咪孫莉嬲到報警處理，即使有搵出造謠者，但最後一家人都係選擇唔追究：「一個小女孩受到這樣的傷害，我們和多多還是選擇了原諒對方並一直沒發聲。」