王菀之內地開巡唱　攰到爆素顏示人

歌手王菀之（Ivana）正在大陸展開《初回限定巡迴音樂會》，剛完成杭州站，日前她一臉疲態拍片報告近況，片中開首她將前額頭髮遮蓋雙眼，雖然只見鼻和嘴，但聽聲都知是Ivana本尊，她搞笑介紹自己並非是「乜水」，只是因無瞓幾日，所以無謂見太多臉口。她表示除了忙於巡迴騷，也忙於趕交編曲，透露之前花了3年時間學寫管弦樂，立志要成為管弦樂作曲家，並借《王菀之嘅歌鼓勵人》歌詞「想做就去做」自勉一番。

不少網民留言讚，但卻錯重點，指她素顏都十分靚女：「但係撥開頭髮望落去仲係好靚好可愛」、「樣仲好靚，係把聲攰啲。」網民期待她將管弦樂編曲放入巡唱中。