MIRROR登紐約節目「稱王」　Anson Lo流利英文Carry全場

人氣男團MIRROR近日於美國舉行巡唱，日前12子齊人亮相紐約電視台節目《Good Day New York》接受主持 Curt Menefee 及 Rosanna Scotto訪問，更被形容為「The new kings of Cantopop（新一代廣東流行曲之王）」！12子跳唱新英文團歌《Day 0》，雖然場地所限，但仍未有影響發揮。

隨後訪問環節，只得3位「英文擔當」Anson Lo、Ian及Stanley代表發言，日前留言串錯英文的姜濤及AK則一語不發，Ian透露剛到埗不久則趕往錄影，又忙於準備演出，故未有時間四處遊覽。之後輪到Anson Lo「騷Quali」，以英文介紹cantopop，表示：「我們一直努力擁抱並吸收世界各地不同類型音樂，這當然包括西方音樂，我們也喜歡他們，再加上香港獨特的旋律風格。它無處不在，任何人何時何地也能欣賞。」在3子之中發言最多，大晒流利英文，輕鬆Carry全場！

至於主持問到誰跳舞最好時，Stanley微笑指向Anson Lo，Anson Lo亦即場示範簡單律動，問到誰唱功最好時，AK及Stanley則同步指向Ian，Ian則露出甜笑回應。

事後MIRROR分享能參與這次訪談的感受，其中Anson Lo道：「今次好榮幸上到FOX呢個節目，其實由細到大都冇諗過可以上到美國一個咁著名嘅電視節目，甚至可以喺上面表演兼且同主持玩，呢件事對自己嚟講好奇妙。我哋以MIRROR呢個身份見識咗好多，特別係紐約，因為呢個地方真係好大，更加令我哋覺得自己好渺小，所以呢個係一個好好嘅第一步，令我哋更加有動力繼續前進。」Edan亦表示：「好榮幸，冇諗過可以上喺海外嘅一個訪談節目做訪問，同時亦都好緊張，因為喺一個唔係自己熟悉嘅地方，然後要表演，仲要接受英文訪問，大家都好緊張呢次表演同訪談，但我覺得大家都好盡力做到最好。好開心有咁嘅機會，希望未來有更加多咁嘅機會。」Stanley亦表示：「可以上到FOX呢個節目，感覺係超級Amazing，所以我哋非常珍惜今次嘅機會，希望可以做得再好啲。希望大家會喜歡我哋嘅表演啦！」姜濤亦道：「我哋MIRROR好開心有呢次機會，希望未來日子可以有更多人聽到我哋嘅作品。」