梧桐妹自學畫畫2年晒成品　進步神速震驚網友

台灣影后賈靜雯嘅大女梧桐妹，年滿18歲嘅佢就相當有主見，其大膽前衞嘅打扮，更係不時喺社交網掀起熱議。而日前梧桐妹就唔再喺社交網賣大包，反而大方分享自學咗2年嘅畫功，並晒出2年前後嘅畫作對比，引嚟唔少網友留言大讚：「也差太多！」

日前，喺社交網晒出一輯電腦畫畫成果嘅梧桐妹透露道：「想跟大家分享我兩年前第一個畫畫，跟今天剛畫的，就是第一張跟最後一張唷！」從成品所見，啱啱開始畫畫嘅梧桐妹，筆觸較為生澀外，人物骨架及上色技巧都較為簡化，隨着畫功熟練嘅提升，作品亦變得愈來愈精美，其中最後一張動漫人物「星野愛」，更將佢精湛畫功展示無遺，唔講仲以為係原作者畫㗎！