「安心事件」許志安激罕5字回應　直言已經好幸福

藝人許志安及黃心穎，2019年4月爆出「安心事件」醜聞後，演藝事業直插谷底，沉寂多年嘅2人雖然相繼復出，但仍不時被提起相關話題。日前，接受黎芷珊新節目《芷珊約您》訪問嘅許志安，亦難得重提當年「安心事件」對自己造成嘅衝擊：「你最灰嘅時間，對將來嘅事業仲有冇期望？」表示唔敢有期望之餘，更直言係「一世的傷疤！」而被問道有咩想同10年後嘅自己講，許志安則語重心長道：「其實你好幸福啦！」

藝人黎芷珊全新節目《芷珊約您》將於下周日（21日）晚9時半於無綫翡翠台首播，芷珊碌盡人情卡廣邀在樂壇舉足輕重的7位代表人物，包括張敬軒、楊千嬅、王嘉爾、溫拿、草蜢及許志安等，並跟著他們先後走訪紐約、上海、澳門、馬來西亞、高雄、及廣州等不同地方，以跟拍形式貼身直擊舉行世界巡迴演唱會時台上台下的珍貴點滴，又與嘉賓們暢談人生，當中千嬅和安仔更會坦蕩蕩分享遇到事業低谷時的真實感受。

芷珊除了緊貼嘉賓深入舞台不同角落，還會由綵排一直貼身跟拍至上台，為大家揭秘嘉賓臨上台表演前最真實一面；芷珊與嘉賓的訪談地點亦不會局限於餐廳或室內，其中張敬軒一集，芷珊便與軒仔坐在紐約的Limo（豪華轎車）上閒話家常，仲要大歎香檳，勁 Chill！

而《芷珊約您》早於去年年初已開始籌備，芷珊受訪時透露節目構思起點源於疫情過後、自己私心想出國旅遊順道拍攝節目，難怪芷珊亦笑指是「自肥」之作：「以往做開嘅訪談節目多數坐定定，但係依家觀眾要求愈嚟愈高，多啲畫面會更加吸引，所以就諗有咩形式嘅訪談節目可以飛去唔同地方呢？加上歌手系列我未做過，所以就諗到需要周圍飛嘅巡迴演唱會。」經過一輪籌備及聯絡工作，節目於去年7月正式開拍，芷珊續指希望透過節目，讓觀眾看到更多歌手們不為人知的一面：「大家只係睇到台上嘅表演，台後其實仲有好多特別嘢，諗都諗唔到會發生嘅，我覺得都幾有趣㗎！」

能夠請到多位樂壇頂級歌手擔任嘉賓，娛圈人脈甚廣的芷珊笑言亦有「食檸檬」時候，原因與「紀錄片」拍攝形式有關：「有啲歌手嚇親，因為全程要跟住，但我就係想有變化，所以最終唔成事。同埋嗰陣係疫情尾聲，有啲歌手仲會戴口罩，同埋除咗開騷其餘時間都留喺酒店，比較難配合拍攝。」加上每位歌手檔期不同，演唱會後台又多「神秘禁地」，洽談過程絕對是一大挑戰，芷珊說：「雖然台後好多嘢拍，但有啲嘢唔穿得，要一路同嘉賓嗰邊傾。」

芷珊又揚言節目「咩都有得睇」，訪談內容除圍繞事業、家庭、私人生活，還會探討社會話題。談到為何能贏得如此多藝人信任，芷珊笑指除了事前要花功夫做功課，對受訪者有深入及清晰的了解外，還必須與對方事前有充分溝通：「我訪問前會再同佢哋傾吓偈先，畀佢哋知我嘅方向係點、希望件事出嚟係點，等佢哋有信心，就會好放心、好坦白咁同我盡訴心中情。」