金像獎︱余香凝揮低衛詩雅　大熱膺最佳女主角

《第42屆香港電影金像獎》最佳女主角今晚（14日）揭盅。時勢造影后，成為大熱的女星余香凝憑電影《白日之下》，揮低衛詩雅和謝安琪首奪最佳女主角，認真威水。成為出爐金像獎影后的她，於宣布一刻與老公相擁，她於台上眼泛淚光發表得獎感受，表示可以站於頒獎台上特別幸運，感謝古天樂願意投資該片，又感謝家人，除了感謝媽咪於她失意之時，永遠是她背後的最大動力，余香凝還公開向老公發表愛的宣言:「我要多謝老公，冇你支持我咩都做唔到，喺我接每一個角色、每一個劇本時，你每晚都會陪我對劇本，仲有我兩個小朋友，媽咪有夢想不斷去追夢，我會用一生嘅時間去鑽妍做更好嘅演員…女性就算人生去到咩階段，都可以努力去追求夢想。」

勇奪金像獎影后的余香凝，於後台受訪時仍難掩興奮之情，指剛才於台上太緊張，忘記了感謝該片導演，隨即把獎座敲自己個頭，並表示：「我多謝佢100次都唔夠，因為最初係佢打畀我，問我仲想唔想演戲，嚟唔嚟casting....好多人覺得一個女人，結咗婚生咗小朋友就未必會再做幕前，好多謝佢邀請我演呢個角色，覺得我適合個角色。」更坦言作為新生代演員，如今可以站上頒獎台，全因幸運遇上該片及角色，寄望之後陸續有新生代演員也能站上台攞獎。

對於於頒獎禮獲得好成績，余香凝再一次感謝老公：「佢好辛苦，因為我好忙工作，最近每晚都係佢負責湊小朋友，佢放工食完飯，仲要陪我背對白同背稿，好多謝佢喺我身邊，雖然精神上好攰，但兩個人一齊就已經好滿足。（咁媽咪平時點鼓勵你？）佢鼓勵我冇乜嘢係過唔到，我哋做呢行好多時有高低起跌，要面對外界好多聲音，作為人都會有情緒，媽咪話過到就係我叻女，佢畀好多正能量我，其實媽咪最初話唔嚟，喺屋企湊女，原來最後有嚟到，好開心，之後同團隊打邊爐同飲酒慶祝。」