娱圈单打︱被人认错兼失奖　努力点解冇回响

香港电影金像奖圆满落幕，唔知赛果系咪令大家满意呢？凭《不日成婚2》角逐影后的卫诗雅，最终只系陪跑，连当事人都预咗。赛前爆出大热港产片《白日之下》，女主角原属意卫诗雅担任，甚至曾在导演陪同下，亲到法庭旁听有关案件审讯，点知到头来只系为别人作嫁衣裳，余香凝唔止得到角色，仲攞唔少奖。

所以话啫，呢啲就系时也命也，唔系你就唔系你！卫诗雅回应被抢角色传闻时亦非常得体，认为最紧要电影有好成绩，自己无缘参演并不遗憾。之不过，唔少网民都替她不值，认为其演技比余香凝好。其实，好多事情都冇得解，事实系余香凝凭此片发热发亮，卫诗雅则饮恨，想要弹出，惟有再等等。

讲开又讲，卫诗雅入行都有十几年，外形甜美，又有亲和力，获网民大赞“Girlfriendable”，近年演技仲有显著进步添，却硬系跟大红大紫有大段距离。早前仲闹出“尴尬过关家姐”的认错人事件，令人疑问，乜卫诗雅真系咁大众脸，没有辨识度咩？

话说薛家燕在电台做节目，邀请卫诗雅担任嘉宾，点知家燕妈妈竟然认错人，误将此诗雅当成彼诗雅，以为系陈家乐新婚娇妻连诗雅，仲不停恭喜佢有咗身己，搞到卫诗雅红都面晒，只能傻笑更正，𤓓到想搵窿捐！

就连娱圈长青树都将两个诗雅搞混，想来唔少观众可能都系一样！唉，明明有齐走红条件，偏偏争咁啲，问题究竟出咗喺边呀？会唔会就系呢个诗雅唔够进取，一味随遇而安，结果唔止女主角落在旁人之手，就连星途都平平无奇呢？