Chris再增一項控罪5月續審　李龍基情深落淚承諾永不離棄

歌手李龍基的畫家未婚妻王青霞（Chris）自稱透過優才計劃來港，年初突傳出因內地旅客身份涉逾期居留，而遭入境處拘捕接受扣查，今日（16日）在沙田裁判法院提堂。Chris控罪包括兩度違反逗留條件、涉及兩間大學的虛假文書等，共被控6項罪行。

李龍基約9時許現身沙田裁判法院，穿上紫色名牌恤衫的他手持公文袋，神態輕鬆，問到是否擔心？他説：「係呀，少少。（尋晚瞓唔瞓到？）瞓咗2個幾鐘，唔錯呀，OK！（琴日有冇探女友？女友心情？）冇乜特別，多謝關心。（對審訊有冇信心？）交畀律師處理。」看似消瘦了的他，表示因有Keep Fit，之後便步入法院大樓。

控方於庭上向法庭新增一項控罪，指Chris違反逗留期間接受工作，法官宣布將案押後至5月28日早上9時30分於沙田裁判法院續審。

李龍基坐於旁聽席，等候期間不時以手按額眉心作沉思作狀，當法庭讀出未婚妻Chris名字時，李龍基即緊張地望向犯人欄，身穿卡其色套裝套、粉紅色上衣、紮辮及戴上口罩的Chris亦現身犯人欄，神情有點憔悴，二人眼神即時對上，李龍基激動以手掩嘴，而Chris則眼泛淚光，此時控方向法庭表示要求加控一項控罪，指Chris違反逗留期間接受工作，法官宣布將案押後至5月28日早上9時30分於沙田裁判法院續審，Chris則需要繼續還押。

李龍基離開法庭時先跟律師商討，隨後乘電梯預備離開法院，期間記者提及未婚妻Chris時，李即忍不住痛哭，記者向他遞上紙巾，拭乾眼淚的他步出法院接受訪問。提到Chris再被加控罪，他表示交由律師處理，表示現時仍保持每天探望對方：「佢每日都要見一見我，我日日都會見一見佢等佢安心啲，我係佢最大支持。（佢知道新增控罪心情點？）唔知，律師同佢傾。（有冇鼓勵説話想同佢講？）叫佢唔使擔心，我一定支持佢，我係佢最大支持。」他表示未婚妻每天也有寫信給他，但未有太多提及案件：「若果係事實都要接受。」他表示律師要先再仔細理解控罪內容，再決定合適做法。

問到工作安排，他表示會留港工作，當提到未婚妻於懲教所會看到相關報道時，李龍基即忍不住再次哭起來，他説：「佢睇到出邊啲輿論話我唔要佢，我要畀佢知，我對燈火發誓，我同佢講唔好睇啲人立亂寫嘢，我係唔會變嘅！」問到是否要推掉所有出埠工作？他表示要視乎情況，若可以每朝趕返香港見Chris便會接：「不過5月尾要去澳洲大約10日，做嘢搵錢。（5月28續審？）28號我仲喺香港。」他指太太比最初被捕時心情已比較放開，問他是否同樣需要別人關心開解？他表示自己沒有問題：「當然有時激動啲，但係我OK嘅我OK嘅。」他透露凌晨二時已起床，因擔心沙田會交通擠塞，故提早出門，早上7時許已抵達法院附近：「我希望唔好遲到，因為我遲到佢見我唔到，我覺得辜負咗佢。（Chris父母有來港？）冇，佢唔想佢父母喺呢個環境見到佢，希望去返一個自由嘅世界再見到佢會好啲，我都同佢父母講『得啦，唔使擔心，有我喺度睇住佢得啦。』」他指身邊有很多朋友擔心他，表示想一起來聽審，他感謝大家對他的關心。

案件編號：STCC/688/2024