張學友攻蛋加場3分鐘秒殺　58萬人同時搶飛

歌神張學友早前喺上海開騷狀態大勇，並緊接着宣布5月尾至6月初，喺台北小巨蛋開個唱，6場門票更係開賣即秒殺，引嚟唔少搶唔到飛嘅歌迷哀鴻遍野，對此主辦單位亦宣布於6月14、15、16日加開3場，加場門票亦於今日（21日）中午時段開賣，未料僅開賣約3分30秒就火速售罄，對此張學友亦開心表示：「非常謝謝大家的熱情支持，很快就要與台灣歌迷見面了，非常期待。」

據台媒統計，今次張學友加場3場門票開賣時，約有58萬人同時在線搶票，完全係一票難求，即使主辦單位透過社交網宣布3場加場門票已全數售罄，但仍引嚟唔少搶唔到飛嘅網友留言問會唔會再加場，對此主辦單位亦回應道：「希望加場，但今年真的都沒有適合場地了。」而張學友2017年2月喺台北小巨蛋舉辦6場嘅「A Classic Tour學友．經典」世界巡迴演唱會，亦同樣一票難求，向來寵粉嘅張學友隔年更重返小巨蛋加開6場個唱，人氣認真驚人之餘，連開9場演唱會嘅佢，更係再次創下歌神新紀錄。