袁文傑無預警做老竇　變身慈父抱女去睇波

藝人袁文傑近年喺TVB處境劇《愛．回家之開心速遞》中飾演嘅「潮偉」一角備受好評，事業更係再創高峰外，愛情方面更係同樣豐收，2020年抱得美人歸後，更不時喺社交網晒恩愛，認真羨煞旁人。而日前，袁文傑無預警喺社交網晒出抱混血BB女嘅相，笑到四萬咁口嘅佢更直言：「我真係好幸福！」

而從佢分享嘅相中可見，身處大埔運動場觀眾席嘅佢，睇波之餘仲學做爸爸湊女，B女更似乎太舒服喺袁文傑嘅懷抱中瞓着，雷打不動嘅甜睡樣認真冧暈唔少粉絲。而袁文傑則係面紅紅兼笑瞇瞇，似乎相當享受做「爸爸」湊女，慈父模樣引嚟唔少網友留言激讚：「好有慈父Feel呀！」、「開心到紅都面晒！」、「文傑湊BB真係好掂呀！睇吓妹妹睡得幾甜！」、「嘩…袁生勁過潮生，連鬼妹仔都冧喎！」