张家辉狂赞关咏荷不嬲都正　唔介意新片变网大

影帝张家辉、周励淇及唐文龙昨天（23日）晚上现身九展，出席电影《超意神探》首映。受访时谈到今次扮演角色记忆力回异于常人，家辉笑说：“拍戏方面我觉得自己几好，以前喺无綫拍古装剧，一口气背页零两页纸对白完全冇问题，不过现实生活要处理自己嘅嘢，特别容易冇记性，呢个情况好多年前已经发生。（咁交晒畀老婆处理？）又唔系，佢都会问番我，总之记到就记啦，记唔到都冇办法。”

谈到早前关咏荷“复出”拍广告，引来网民热话，不少人赞她保养得宜，家辉自豪回应：“佢不嬲都系正。（喺屋企望住佢都话正？）有呀，我真系同佢讲妳老有老靓。（你把口真系好识凼佢。）我唔系凼佢，佢真系成日呈现到佢系一个好靓嘅人，唔见我成日收埋佢喺屋企咩？（赞自己好眼光？）都系佢好彩啫。（咁你有冇压力？）我本身都系一个靓仔，有咩压力？你哋唔系未见过呢啲混血儿呀？番禺沟广州，哈哈！”

周励淇去年被全被传怀上第二胎，她笑答：“今日咪见到冇啰，真系冇，其实一个小朋友都几好，暂时唔谂喇。凑住仔仔我已经好辛苦，因为全部嘢都系我自己搞，呢几年根本冇晒工作时间，不过嚟紧佢升K2 ，我应该会出番嚟做嘢喇，可以返吓内地。（宁愿凑仔定返工？）梗系返工啦。”

另外，《超》片于内地突变网大推出，家辉大方表示不介意：“我只系喺演员嘅岗位做演员嘅事，唔系负责决策，只系今次故事同人物赋予嘅元素好丰富，我谂冇乜演员攞到呢个剧本唔想去做，而其他问题其实同我冇乜关系。（内地网民话‘张家辉都拍网大’？）我一直都冇刻意唔做网大，网大都系演戏啫，即使电影、电视剧及舞台剧等等都系表演工作，我唔会排除以后再演网大，如果遇到令我好心动嘅剧本或班底，我都会接，会将呢啲嘢秤先。”

另外，有份参演《超》片的谭耀文因为有工作，而未能出席首映。他回覆表示：“呢个片系喺疫情严重期间接拍嘅，所以更加珍惜呢次机会，尤其今次家辉系唯一一个同我演对手戏嘅演员，所以隔离21日都觉得好值。同家辉合作过后，我就只系差周润发一位影帝尚未合作过，希望快啲‘集齐一套’啦。”