鮮娛糧︱蔡嘉欣拜金都可以精明　「慳家」開箱名牌手袋

「拜金港姐」蔡嘉欣自從自認係「拜金KOL」之後，佢啲炫富開箱片偏偏最多人睇，因為佢成日都買到大家排隊都排唔到嘅限量包包，代替網友滿足一下「購物欲」。今次佢又再次拍奢侈品開箱片，分享新入手嘅三個名牌手袋及靚鞋，估唔到佢原來都好「慳家」。

其中一個手袋佢用商場積分換購，另一個手袋則係由代購買入，所以比原價略貴，而該包包公價約4萬5千元，第三個手袋佢就自爆用咗2萬8千蚊入手。蔡嘉欣又分享三對名牌靚鞋，佢強調係趁減價6折時購入，只有一對鞋係原價。網友見佢都係等減價或者有優惠時先入貨，雖然價格都仲係令普通市民望塵莫及，不過都好多人大讚佢「精明拜金」，都係量力而為。