黃嘉雯與多年未見爸爸相認　即搞大型婚禮同賀

前港姐冠軍黃嘉雯（Carmaney）於無綫劇集《逆天奇案2》演張雷女兒，二人在病床相認的場口，流出真摯的眼淚觸動人心，Carmaney受訪時直言喊戲難演繹：「因為要好短時間進入到個角色，呢場喊戲好靠自己幻想，因為角色轉折好大，咁多年都冇見過爸爸，但係一見面爸爸就為咗我擋槍，所以都好多事前準備功夫，我會寫低自己角色嘅成長背景，同埋導演都好好，會喺我耳邊講咗好多故事畀我聽，令到我更加入戲。」

首次與張雷合作，Carmaney表示雙方首次見面，對方已向她交流戲劇心得，更說：「手術室嗰場戲，我真係當咗佢係我爸爸，張雷前輩都話我哋喺劇中做父女，好似結咗緣咁！」至於問到結婚場口，Carmaney笑言：「雖然唔係第一次着婚紗拍劇，但今次個婚禮規模係好大型，劇組真係Book咗一個西貢嘅婚禮場地，仲好認真整晒人形紙牌，成個排場都好勁！」