伊能靜自爆愛上秦昊原因　結婚9年熱度未減

女星伊能靜2009年與藝人庾澄慶離婚，並於2015年下嫁年輕10歲嘅內地男星秦昊，多年來2人感情穩定又甜蜜。而日前，伊能靜為秦昊新戲《哈爾濱一九四四》做宣傳，更感性發文表示自己當初認識秦昊時感覺對方相當迷人，即使如今2人已經結婚9年，但秦昊對佢嘅魅力仍絲毫未減。

日前，伊能靜喺社交網發文為秦昊新戲宣傳，提到自己啱啱識秦昊時對方先35歲：「那時的他有點狂，對表演有近乎虔誠的信仰；那時候的樣子，我承認：很迷人」至於秦昊拍攝期間從微肥變瘦，伊能靜更大讚：「每次回來都帥我一臉，彷彿初相識時他的35歲。」並強調依家嘅秦昊已經唔係當初嘅秦昊：「從演各種極端角色、喜歡挑戰到上癮；到愈來愈趨向角色生活化，放棄表演的痕迹和設計：他不要舞台，只要真實」更透露秦昊為咗擁有「真正嘅生活」，鮮少過所謂嘅「明星日子」，唔鍾意參加活動、應酬等，亦盡量避免消耗表演嘅人事物，2人相識11年間每日都係：「牽手散步、看電影讀書，聊一晚的天，喔！還多了個陪伴女兒。」