蔡依林天后下凡食蟲充飢　點醬放入口埋門急煞停

天后蔡依林近年喺內地巡演完，每一站都會拍影片分享當地美食或風土人情，佢最近就去到溫州場，仲喺大雨中敬業演出，被讚係「人間美人魚」，之後佢就繼續搜羅當地美食，其中一道特色料理，就令佢難以置信地驚呼咗好幾次：「Wow，蟲！蟲！甚麼？！」

原來工作人員為佢準備咗呢道蟲蟲料理「泥蒜凍」，初時佢以為係皮蛋，工作人員解釋係由沙蟲製作嘅料理，並推薦話食起嚟好鮮美，膽大嘅蔡依林二話不說夾起「泥蒜凍」點埋醬，不過佢放入口前都係忍唔住稍微停頓，做足心理建設先開口食，佢仲好評此道料理：「QQ的，還不錯，有嚼勁。我喜歡QQ的。」果然藝高人膽大。