林峯S形走位十字韌帶斷一半　恨同劉俊謙拍BL四角戀

藝人林峯、劉俊謙、胡子彤同張文傑近日現身ViuTV節目《周六食花生》，宣傳電影《九龍城寨之圍城》，分享拍攝期間的趣事和感受。今次戲中有大量打鬥場面，林峯自爆受傷驚險事：「有個動作係要S字形走位，之後去檢查嗰陣先發現原來十字韌帶斷咗一半。仲有次試戲嗰陣，係二樓同武師對打，個情景就係佢要向我進攻，我就要向後退，但我唔小心差錯腳，由二樓跌咗落一樓。好彩下面有一堆道具墊住，就冇點受到傷。最唔抵係當時未開機，冇拍到。」而劉俊謙指拍攝期間不小心被電單車死氣喉燙傷小腿，胡子彤則意外被踢傷下巴，需縫14針。

談及對彼此的印象時，劉俊謙笑言小時候是看《尋秦記》長大，所以林峯是陪自己成長的一個大哥哥，並指其十分溫柔和細心：「佢知道我好鍾意食朱古力，有日拍到好攰，佢就遞咗盒朱古力送畀我，嗰刻真係覺得嗰盒朱古力係我嘅所有。」被問及下次4位兄弟合作會想拍甚麼題材，林峯笑言想一齊拍BL四角戀，令在場所有人都哭笑不得。