李多慧cos女戰士襲港　緊身衫騷Quali勁煞食

南韓啦啦隊女神李多慧今日出席遊戲機活動與近百粉絲舉行見面會，化身遊戲角色女戰士 EVE現身的她，雖然裝扮密實但貼身衫下曬曲線身材，她出場即賣口乖以廣東話講：「大家好，我係李多慧。」同場的網紅林慧韡(達哥）大讚她靚女，指樣貌與身材高度還原角色，李多慧聽後開心表示多謝。

首次來港的她，覺得香港好色彩繽紛，對香港第一印象相當好。平日嗜好打機，試過最耐連打5個小時，鍾意打機的樂趣，之前工作關係都試過cosplay，問可覺得角色似自己？她表示：「角色好靚女，話似自己有啲唔好意思，有啲怕醜，對自己腰臀比例較有信心，呢部分有啲似。」可想試扮另一個較性感角色？她一臉驚訝說：「因為自己畀人印象清純可愛，如果有其他面貌表現都好樂意。但性感祼露就唔得，上下身都要着衫。」

她表示與隊友林襄是非常親密好友，最近一齊轉隊，有互相照顧，溝通得好好，問覺得她和林襄邊個較靚？她笑言：「我哋各有不同魅力。」而今日前隊友林岱縈亦在港出席活動，表示已相約對方，看能否夾時間約出來傾偈。