陪細女參加北京遊學團　胡諾言有艷遇即場交換聯絡

藝人胡諾言（胡仔）的細女Jacey不經不覺已11歲，步入青春期的她愈大愈靚女，作為爸爸的胡仔當然要𥄫到實，早前學校舉行北京遊學團，胡仔二話不說陪足全程，原來以往走遍內地多個城市開工，但偏偏從未踏足過北京，他接受東網訪問時表示：「今次係第一次去，所以出發前好期待，有參觀天安門、萬里長城、四合院等，真係好難得。」

過程間，胡仔更有艷遇，他說：「去到萬里中段位置時，啲小朋友有停低稍作休息，我就繼續行上少少睇吓，中途有兩個外地交流生主動同我閒聊，問我係咪無綫演員，仲話佢哋學緊廣東話，問可唔可以影合照。後來大家仲交換咗通訊，返到香港講畀太太（陳琪）聽，佢笑我有艷遇，呢個都係幾得意嘅經歷。」他又指即將開新劇，未來2、3個月將中、港兩邊走，現時已收拾心情投入新角色：「呢排都好多粉絲問我幾時再拍劇，好開心就快開工，至於《流行都市》主持工作都會繼續做，只係時間要分配得好啲！」