姜濤獲「第二頭家」驚喜贈Cake　難得怕醜高8度大嗌

男圑MIRROR成員姜濤聽日（30日）將迎嚟25歲生日，因連續多年獲海量姜糖（姜濤粉絲暱稱）於正日湧到銅鑼灣打卡應援慶生，因此網友笑稱姜濤生日為「姜濤誕」。今年姜濤因工事而要提早同fans去主題樂園慶祝，不過更令佢窩心嘅，一定係被佢指為「第二個家」嘅維多利亞公園籃球場一班波友為佢驚喜送Cake！

姜濤曾表示就算成名後，都唔會放棄落街場打波，近日佢就如常現身維園打波，點知佢打到一半，一班波友原來預先準備咗送蛋糕慶祝佢生日，令佢又驚又喜，仲興奮到高8度咁怕醜講：「唔好搞呢啲得唔得呀？好多人望住呀！」又搞笑提醒波友記得send番段片畀佢回味，真係好有心。唱完生日歌之後，眾人就開玩笑地拍拍佢Pat pat，又圍埋影大合照，成個畫面勁有愛，姜濤似足小朋友咁捧住個cake周圍走，感受「家人」滿滿嘅愛與祝福。

姜濤雖然人已隨隊友起程往新加坡舉行巡唱，但為同姜糖慶祝聽日（30號）牛一，宣布特別推出第15胎新歌《好得太過分》MV，更喺社交網寫明係「birthday’s special」，當係送畀自己及姜糖嘅禮物，相當有愛。轉頭佢再派福利，開心Share幾張喺紐約拍攝嘅靚仔相及短片，留言：「聽說很多人沒看到過我的額頭。」片中見佢心情靚爆，除閉目享受陽光外，又任涼風撲面，吹到頭髮飛起，又佻皮地張嘴食風，全程投入大自然。