鮮娛糧｜9歲天才攝影師操刀　張智霖袁詠儀被教擺甫士

男神張智霖（Chilam）與老婆袁詠儀（靚靚）出席北京車展，現場有不少專業攝影師，幫Chilam同靚靚拍攝留倩影，而在一眾攝影師之中，有一位比其他人特別矮小，皆因她是9歲的攝影神童笙笙，更獲特別安排跟Chilam同靚靚獨立拍照，指揮二人如何擺靚Pose，有板有眼，靚靚對這位攝影小妹妹非常友善，由頭笑到尾。

Chilam同靚靚被拍攝的經驗無疑十分豐富，但由9歲的小妹妹操刀，卻是相當罕有，來自上海的笙笙（鄒笙羽），曾幫多位紅星拍照，包括梁朝偉、彭于晏、周迅，而跟Chilam已經是第2次合作。笙笙父親是攝影師，在5歲時笙笙獲贈菲林相機，之後跟父親在街頭拍攝，由於笙笙是小女孩，所以她的出品視角相當低，亦形成她獨有的攝影風格。面對天王巨星，笙笙完全沒有壓力，當天為Chilam夫婦拍照，也不斷指導二人，對於可愛的笙笙，一直恨生女的靚靚，更是笑容滿臉，全程跟小妹妹細聲講大聲笑，母愛大爆發。

至於Chilam則對笙笙的攝影技術讚口不絕，且忽萌其想計劃邀請對方，為自己稍後舉行的演唱會拍攝宣傳照﹕「不過（演唱會）最快都要明年先得，事關年底前我有影視作品要拍，但都傾得七七八八嘞，有好消息會盡快同大家公布。」