姜濤誕意外捧紅疑惑外國男　被困「姜糖陣」認唔識頂流

男團MIRROR「人氣王」姜濤剛喺4月30日過生日，因每年其粉絲「姜糖」均會喺偶像「發迹地」銅鑼灣舉行大規模生日應援活動，網友均喜稱該日為「姜濤誕」、銅鑼灣為「姜濤灣」。雖然今年姜濤生日正日唔喺香港，不過大批姜糖繼續進攻銅鑼灣，當中一位身穿白Tee外籍男子剛好經過銅鑼灣，意外被拍攝到佢等候過馬路一刻，佢身後就有大批手持應援物嘅姜糖圍到實，而該外籍男子亦露出一臉疑惑表情，火速成為香港網友討論對象，又用佢張相製作Meme外圖（網絡搞笑圖片），相中主角更現身社交網透露當下身心狀態！

相中主角Alex MacGregor現身留言指自己當時其實好肚餓，亦唔知當日為何銅鑼灣會水洩不通：「It me. I was hungry.」又表示自己本身就住喺銅鑼灣：「I live here.」Alex收到唔少message解釋「姜濤灣」擠塞原因，當被問到識唔識姜濤時，佢直認唔知道係邊個，搞笑對話成為網友關注重點，亦令Alex於網上爆紅。