張馳豪節食操肌　轉走性感路線

藝人張馳豪(Aska)日前接受電台訪問，宣傳今年第一首派台歌《Dirty Rhythm》，新曲一改斯文怕羞仔形象，曲風更180度大反轉玩性感，自嘲手腳不協調的他，直言向來最不擅長快歌及跳舞，故今次要做出性感誘人舞步及表情，令其增添不少壓力。

為配合新歌MV，Aska坦言花了約一個月特訓跳舞及操肌，他說：「第一日上堂時排舞師跳咗Chorus(副歌)部分俾我睇，我真係O咗嘴！因為排舞師跳出嘅舞步好有型，所以嗰刻覺得後悔改變曲風，因為擔心呢個係不能完成的任務。同埋我都有控制飲食操弗身形，亦有掌握最佳表情管理，呢段時間對我人生係好好嘅歷煉，因為我學識咗一件事，真係為咗一件事去努力！」

Aska更指為展現弗爆身形，於拍攝MV前兩星期嚴格控制飲食：「嗰段時間淨係食菜，通常係西蘭花、雞肉，通常係雞胸，雞髀都得，但唔食皮，跟住就係番薯，主要係呢3樣嘢，一日3餐全部都係呢啲嘢！」至拍攝前幾天，為達致「收水」效果，還要控制飲水量：「想令到拍mv嗰日肌肉係最脹，所以嗰段時間都幾interesting！」