李琳琳開工獲姜大衞做柴可夫：佢知我輪盡

資深藝人李琳琳今日（4日）現身電台接受薛家燕的電台節目《開心大派對》訪問，二人相識多年，琳琳對家燕表示欣賞，讚對方是一名開心果，做事又勤力，今早跟她短訊聯絡全是工作，對工作充滿熱誠。李琳琳冒着紅雨前來電台為電影宣傳，表示為主演的電影宣傳會不遺餘力，笑言後生時好懶，現在年紀大覺得有責任要配合，要出一分力。

提到老公姜大衞（John）不放心專程揸車送她到電台，她表示：「John哥本身要拍外景，但外景取消，佢話不如車我來，知我輪盡，平時都會管接管載，一定會車我，費事我搭的士輪盡。」有指電影口碑不俗，她認為電影甚有戲味，鋪排很好，好易帶觀眾入戲，問會否再接再厲再接新戲？她覺得好劇本可遇不可求，不過身體大不如前，不會太拼搏，有好劇本都願意試，但不會演出太多，暫時都未收到新劇本。

提到母親節將至，她說女兒跟自己後生時好似，非常注重節日，自言自己時間多，沒有煩惱，日日都好似過節：「不過一定會食餐飯，特別女婿曹永廉煮嘢食好叻，好似蒸魚，成日叫女問我幾時去佢屋企開餐。」