譚旻萱拍廣告打波被嫌太狼　自爆因1事被公司禁打籃球

新一代女神譚旻萱（Mandy）憑精湛籃球球技，被冠以「籃球女神」稱號，最近獲護膚品牌垂青，拍攝品牌全新防曬系列廣告。廣告以打籃球為主題，她跟男演員在場單對單較量，一有籃球在手，即精神抖擻的她，全神貫注跟對手對打，誰知導演見Mandy打得太忘形，因面部表情太「狼死」而被叫停，惹來全場大笑！

Mandy笑說：「我好鍾意打籃球，所以每逢工作時要打籃球都會覺得唔似做嘢，係好開心嘅。最搞笑係導演覺得我打波時個樣太兇狠，因為自己太投入冇注意到。」談到打籃球，Mandy開始滔滔不絕，更憶起初入行後比賽時險毀容的經歷，她說：「之前曾經同啲叔叔打波，對方要護住個波，就批踭批到我個嘴撞爆咗，當時我都好痛，仲有喊，但我唔係因為痛而喊，而係驚毀容，覺得自己會玩完，要另謀生計……好彩爆嘅係嘴唇入面，自此公司就嚴禁我打波打得太狠，其實長大後我個人係文靜咗，但係打波習慣偏狼死，有啲難改。」

最近Mandy積極增值自己，瘋狂做gym、跑步、學戲與學武術等，為迎接新挑戰，她說：「為之後嘅工作做好準備，嚟緊會有新挑戰，一直上緊堂學緊嘢、勤力啲做gym，飲食都要節制吓，食得清啲，都想減吓磅，減吓依家嘅幸福包包面。」