那英復出誓要語出驚人　自爆更年期嚇人狀況

內地歌后那英去年因陷入「好聲音風波」而一直神隱，上月佢終於正式復出，又拍新綜藝又頻頻受訪，全面收回失地。最近佢就喺自己個綜藝節目嘅衍生節目《萌探2024》大玩「解答之書」，見佢一本正經咁提出疑惑，首先佢問：「如果血糖太高應該怎麼避免？」得到答案為「回頭看看」，點知佢真係直接擰轉頭觀望，一旁主持人即解釋道，應該係叫佢回顧過去嘅飲食習慣，那英聽完後則驚呼：「太神奇！」場面搞笑。

復出後嘅那英更愈嚟愈冇包袱，竟對住鏡頭問：「更年期要怎麼不發脾氣？」翻書回應則寫道「你可能會比較悲傷」，那英瞬間大笑說：「如果不發脾氣會比較悲傷？那我寧願發脾氣，我還是發出來！」影片曝光後大批網友大讚佢依家好幽默，仲笑佢當本書係「大夫」睇醫生，連更年期都拎出嚟講。