星玄｜林夏薇為打理生意戒瞓覺　日飲4杯咖啡死撐

今日係5月8日農曆四月初一，幸運星係巨蟹座，愛情運非常好，無事獻殷勤，伴侶更愛你。視后林夏薇就係巨蟹座，上個月拍完新劇《黑色月光》，又為有份拍攝嘅《逆天奇案2》進行宣傳活動，可謂做到冇停手。

薇薇除了拍劇外，仲有開設自家生意，凡事親力親為嘅佢早前接受訪問，提到自己忙到每日只得幾個鐘嘅瞓覺時間，有時甚至捱完通宵拍劇後，翌日再要同其他同事開會，好似戒咗瞓覺，要日飲4杯咖啡先撐得住。薇薇你嘅愛情運非常好，如果之後有時間放假，就記得同老公去外遊放鬆吓，兼過吓二人世界，你嘅伴侶會更愛你。

至於是日最旺嘅生肖係鼠，桃花旺，身邊有可能出現一位追求者。肖鼠嘅高鈞賢（Matthew），近年轉戰北上做帶貨直播，而於劇集《逆天奇案2》中，飾演黑客高手，同馮盈盈飾演情侶，雖然兩個人喺現實生活中，一個即將結婚，另一個單身，但係拍劇前就曾因為結伴逛深圳超市而傳出緋聞，Matthew曾接受訪問嗰陣亦有講話，如果自己都係單身，都可以考慮，因為盈盈係一個聰明好女仔，由內至外都優越，Matthew真係桃花夠旺呀。