鮮娛糧︱周柏豪馬國出席活動獲逾20人護航　1舉動畀粉絲鬧：太過分

近年轉戰內地發展賺奶粉錢嘅型男周柏豪，先後出演過多套大型綜藝節目，令佢知名度再次大增，加上愛妻慈父嘅正面形象，令佢工作爆棚嘅同時，巡唱更係一票難求。

而日前去咗馬來西亞出席公開活動嘅佢，更係再次展現出高企嘅驚人人氣，剩係喺機場就已經被逾百位粉絲接機外，活動地點更係場面墟冚，隨着周柏豪出場，現場更隨即陷入瘋狂尖叫歡呼聲之中，而為咗現場安全起見，主辦單位更安排咗至少20位保安人員為佢護航，認真有頭又有臉。雖然現場環境擠迫混亂，不過周柏豪仍全程四萬咁口，唔止盡量滿足粉絲要求，仲主動表演球技，氹得現場粉絲相當開心，現場猶如粉絲見面會一樣。

事後，更有女粉絲喺社交網晒出同周柏豪嘅互動片段，並寫道：「周柏豪太過分了！！」原來喺人群周柏豪竟然認出呢位粉絲，唔止主動去握手，仲講咗句冧到暈嘅：「我認得！」認真令該名女粉絲甜到漏，引嚟唔少網友留言羨慕：「手可以不用洗了！」