LOONG 9未紅急捧第二代　辣招選鮮肉網民驚驚

選秀節目《亞洲超星團》誕生嘅組合LOONG 9成團以來是非不斷，繼上月香港舉行嘅LOONG 9簽名會取消，到Loong 9上海見面會飛走3位香港成員，包括冼靖峰、文佐匡及黃奕斌均不在列，似乎真係出師不利。好在近日冼靖峰及黃奕斌分別透露見面會最新日期將定為6月9日復辦。

不過首個見面會仲未搞得成，《亞洲超星團》官方平台就已經宣布招募第二季練習生，未知係咪擔心再有LOONG 9嘅爭議，第二季「收生」條件真係辣好多，當中今屆練習生只收16-20歲男仔，仲要求練習生冇任何經理人合約，又列明入選後要接受培訓及到唔同地方參與唔同錄影，亦要接受唔同代言及廣告。網民睇完條件之後，都戥新一季成員驚驚，LOONG 9粉絲亦表示嬲嬲豬，促經紀公司先將出道團營運好再談新人，怕偶像被分薄資源。