羅毓儀Cosplay小忌廉　爆阿媽係鐵粉

藝人羅毓儀今日（15日）到西環出席卡通片《我係小忌廉》修復版首播活動。以一身小忌廉Cosplay打扮到場的她，吸引大批粉絲到場支持，場面熱鬧。席間大會推出蛋榚，為本月23日28歲生日的她送驚喜，全場高唱生日歌令她相當感動。

談到小忌廉這位卡通人物，羅毓儀笑說：「呢套卡通播嘅時候，我仲未出世，不過我媽咪係鐵粉。今次負責演繹修復版主題曲，事前都做咗啲工夫，不過錄音嗰日我有其他工作，好夜先開始錄音，覺得自己好似跌咗Watt，想有神仙棒變番啲力量畀自己，哈哈！」她又自爆雖然自己外形「相當女仔」，但喜歡的動漫人物卻是「數碼暴龍」及「寵物小精靈」，果然令人意想不到！

談到今年生日願望，羅毓儀表示：「都係希望事業順順利利，同埋身邊人健健康康。（有感而發？）因為依家流感好嚴重，我朋友嘅小朋友都唔舒服，所以真心希望大家身體健康。」而正日當天要開工拍攝《愛．回家之開心速遞》，但她打算收工後與家人食飯慶祝。