陳蕊蕊馬國鬼屋探靈出事　直播遭硬闖：趕我哋走！

藝人陳蕊蕊（Yuri）早前到馬來西亞拍攝旅遊節目，介紹當地旅遊熱點，去了水上樂園、動物園和行夜市，奉旨飲飲食食，但其中有兩晚特別加插去鬼屋探靈，認真驚嚇，探靈經驗豐富的Yuri一向大膽，第一晚拍攝相安無事，第二晚就發生「意外」，她表示：「因為節目係直播探靈，拍攝中途有個本地的直播主出現，一個人喺拍攝現場行來行去，初時都無嘢走咗，之後番轉頭大聲鬧，要趕我哋走，仲掟玻璃，佢自己畀玻璃𠝹損受傷。」Yuri表示第一次遇到此情況，因對方講馬拉話，不明所意，拍攝團隊為息事寧人，立即中斷直播，護送她和另一個女主持上車離開：「過程都幾驚險，因為當時直播緊，混亂場面依家上網都睇得番，掟玻璃情況都好混亂，差啲掟到我。（同老公講番？）有同佢講直播中斷有事發生，當時無講清楚，佢擔心我撞鬼啫！後尾知唔係都無嘢。」她表示不會因此嚇驚不敢再探靈，笑言團隊人多，反指對方得一個人，沒有甚麼可怕。