周杰倫開騷失守爆喊收場　忠粉洋葱告白感動1.5億人

台灣天王周杰倫（周董）最近喺內地開巡唱，平時都係雲淡風輕嘅佢，好少會對外表達軟弱一面，以遊戲人間嘅姿態見人，點估到佢尋日（16日）喺福建福州開騷時，竟難得唱到落淚，被台下歌迷告白感動到，畫面即被推到上熱搜，「#周杰倫哭了#」話題更係有1.5億閱讀量！

周董喺福州演唱會第一日，就被台下歌迷感性告白：「你就像恒星、像太陽一樣，永遠在這裏，我們就努力變成星星，聽著你的歌，發着光。」一字一句都足以令周董感動落淚，位歌迷最後仲點一首《楓》懷念被公認為籃球史上最偉大球員之一的Kobe Bryant，令成件事更有洋葱。

面對今次失守人前，口硬嘅周董都仲係堅持自己唔會隨便流淚，怪都怪自己做咗爸爸之後心都軟晒，仲搞笑叫大家以後點歌都唔可以咁感性：「福州Day1 哥平常是不隨便流淚的 不知道是不是當了爸之後的關係😂 不過還是謝謝那位點歌的朋友 當年在我結婚古堡外等候的那群留學生 今天竟然被我點到 哥會繼續努力當歌迷朋友的太陽的💪🏼💪🏼 #以後點歌不準講感性的好嗎😜」