吳彥祖全家基因勁　混血外甥係田徑新星仲破埋紀錄

男神吳彥祖自出道就已經風靡萬千女性，因為佢外型突出大隻又靚仔，依家娶咗名模Lisa S.做太太兼誕下愛女Raven後，佢就開始深入鑽研演技及荷里活發展，香港粉絲見到佢嘅時間愈嚟愈少，不過依家機會嚟喇，吳彥祖2.0已經橫空現身！前日（20日）吳彥祖忽然分享外甥Sean Fontaine（方賢明）靚相，令網民眼前一亮。

吳彥祖身在美國嘅家姐依家回流返港，並育有三名子女，其中一位就係田徑好手Sean，最近Sean打破多項香港紀錄，吳彥祖對外甥勁自豪，所以決定出post嗌威威，意外令Sean靚樣曝光，吳彥祖亦曾親臨比賽現場支持佢，兩人關係十分好。

吳彥祖以英語大讚：「很興奮我外甥打破了全港運動會800M和1500M紀錄。我們需要他代表香港參加亞運會和奧運！」Sean日前都有分享比賽靚相，又發文多謝媽咪，即吳彥祖家姐：「感謝最棒的媽媽，在天雨綿綿的灣仔運動場度過母親節，並拍攝這輯很棒的照片。」佢又晒兩母子合照，見到年過50嘅媽媽依然保養得好，皮光肉滑，身形弗爆，果然真係全家都遺傳優良基因。