前韓國天團Big Bang成員勝利投資嘅夜店Burning Sun於2019年爆出暴力、販毒、性侵及賄賂警察等醜聞，其後勝利被判囚1年6個月，去年2月刑滿出獄。有英國媒體近日公開紀錄片，還原當年牽扯到韓星鄭俊英、勝利及崔鍾勛等連串醜聞嘅夜店事件始末，更公開勝利粗暴拉扯女生畫面，令事件再次受極大關注。不過近日有消息指，已敗走韓國家鄉嘅勝利有意在港創業再出發，同時更有網友大爆遭對方無禮對待！

近日網上傳出勝利來港，網民爆料指勝利有意喺尖沙咀東部搞生意，加上佢現身香港夜場，估計勝利較有機會涉足酒吧蒲點生意，又傳勝利喺半山買豪宅，傳到似層層咁。

政府發言人回應指並沒有接獲韓國前藝人就任何人才入境計劃的簽證申請，特此澄清。據悉該名韓國前藝人五月初是以旅客身份來港，無需簽證。

同時有網民指上月喺音樂節見到勝利，爆料指當時見到勝利同酒商老闆應酬，又稱「依然有好多女當佢神咁拜」，並指自己同女同事遭對方呼喝：「同你喺紀錄片睇嗰啲語氣有得揮。」最後更勸喻各位女士：「自己睇路呀！」另外，性感女神貝依霖（Chantale Belle）亦晒出同勝利嘅合照，證實勝利的確曾現身香港。

此外，有內地網民指勝利疑似與網紅隱婚，女方更透過社交網晒出戒指，當網民問她是否與勝利結婚，她亦沒有否認，僅表示是自己的私生活。