郭采潔新Look再惹負評　髮線向後驚變「清朝頭」

台灣女星郭采潔初出道時憑人靚聲甜及文青氣質成功入屋，之後出演電影《小時代》更備受好評，而隨着佢事業重心轉往內地發展，風格打扮更係變得極具個性，擁有自己樂團「Mola Oddity」嘅佢，亦不時透過社交網分享生活點滴。而喺日前，郭采潔更晒出一系列演出花絮相，只見身穿白色長版背心嘅佢，下身搭配薄紗長褲，身材顯得更為纖瘦外，近乎All back嘅辮子頭及畫滿銀色彩妝嘅誇張妝容，引嚟唔少網友留言「難以理解」之餘，都有唔少死忠粉絲大讚：「愈來愈有個人風格了！」

事實上，近年郭采潔嘅獨特造型不時引嚟網友抨擊，甚至仲有網友發現佢似乎開始禿頭，不過就唔知係咪壓力太大導致，但仍引嚟唔少網友嫌棄道：「妖魔化！」、「自毀形象！」、「郭采潔變好多，我要認不出來了！」；而喺過往曾經剪過極短髮型嘅佢，同樣引嚟唔少批評：「支持你走個性路線，但這個頭型有點get不到。」、「你的頭髮是怎麼了，好像被狗啃一樣！」