郭富城經典造型復刻　吳兆麟有樣學樣

藝人吳兆麟(Alan)於無綫扮嘢真人騷節目《福祿壽訓練學院》模仿郭富城，跟足城城《第四晚心情》經典裝束出場的他，大晒超強胸肌及朱古力腹肌，加上一對超結實兼壯健的大髀，還未開跳已經震撼全場。本身有拉丁舞底子的Alan，雖然跳唱流行曲經驗欠奉，但配以地獄式日練夜練，成功憑超強「舞」功及body一鳴驚人，加上大量自摸、單眼、震胸及扭腰擰臀動作，全場尖叫及歡呼聲不絕於耳，就連出名閹尖的評審伍仲衡亦讚不絕口：「你真係跳得好好，我略嫌有少少似鴨，好輕微架啫，尤其是你嗰幾吓，好似想人塞錢落你個褲咁，郭富城唔會咁架嘛。如果你能夠再收番嗰少少哩，就係舞台王者，依家就鴨店王者喇。」爆笑全場。

而有20年扮演郭富城經驗的彭建豪，則轉型挑戰深情慢歌《我為何讓你走》，表演同樣獲伍仲衡也畀讚：「我喺電視睇完你，就好想睇呢個節目，你比郭富城更加郭富城，我相信得一個人可以PK到你，就係郭富城。」李思捷聞言亦力撐：「可能有人話：『唓，佢扮咗二十年啦，扮嚟扮去郭富城。』扮得似就係扮得似，你扮嚟睇吓吖，你係最似嗰個。」