莊思敏升呢做戀愛腦媽咪　個女咁大個嚇親好友

熱播劇《神耆小子》中驚喜見到藝人莊思敏身影，原來佢喺劇中做羅毓儀（Yuki）嘅可愛媽咪，劇中性格成個少女咁嘅莊思敏，戀愛腦上身，多次成為愛人嘅「提款機」，更做埋另一半嘅擔保人，欠下周身債，不過同時佢對愛女Yuki亦照顧有加，母女情令人窩心。

提到新劇做羅毓儀媽咪，莊思敏都笑言收到好多朋友Message，話驚訝佢有咁大個女：「我做羅毓儀阿媽，跟住我身邊啲friend就覺得『有冇搞錯啊你點做佢阿媽？』，我都係第一次有咁大個女，以前啲『仔仔女女』都係幾歲，今次『個女』都已經出嚟做嘢。」佢直言今次「阿女」比自己更成熟，自己則係戀愛腦、成日畀人呃，個女對咩食物敏感都唔知，自嘲角色唔稱職，更戲稱自己真係有機會生得出咁大個女：「我同啲朋友講，呢啲嘢冇得睇樣，我純粹係保養得好，如果我真係好後後生，都冇話唔得嘅。」