周杰倫完成400場巡唱　長沙唱4場騷帶動5億消費額

台灣天王周杰倫（周董）最近喺內地開巡唱，唱足400場嘅佢終於都完騷，人氣高號召力強嘅佢，唔係得個朵，據內地官方統計，佢由5月30日至6月2日喺湖南長沙連唱4場，當中就搵嚟頂流王俊凱做嘉賓，竟輕鬆帶動文旅消費5.18億人民幣（約5.59億港元），比五一假期消費額更高！尋晚（2日）周杰倫完成演藝生涯第400場演唱會，佢感性寫道：「哥的第四百場演唱會圓滿落幕了。謝謝幾十年來曾經看過演唱會的朋友們，我會繼續唱下去的。」

周杰倫懶理最近嘅政治立場紛擾，順利登上長沙賀龍體育中心開唱，前日（1日）第3場點歌環節時，佢有感而發說：「很開心我的歌曲可以陪伴你們的青春，所有的杰迷都是我的人生，大家都是一家人。」仲話出道幾十年，每當聽到歌迷訴講感動說話，佢都會假裝堅強，忍住情緒，曾有歌迷將佢比喻為太陽，佢感嘆「這個太陽不好當呀」，並指歌壇新人一直出現，歌迷來來去去，佢如今企喺舞台上，非常感謝在場歌迷幾十年來嘅支持，全場聽完都激動揮舞螢光棒回應，氣氛溫馨。