孫儷鄧超結婚14年紀念　獲封「忍耐性最強女人」

內地一線花旦孫儷2010年嫁畀當紅影星鄧超，二人多年嚟愛得高調又甜蜜，又成日於社交網互相爆醜事同蝦碌軼事，明明係耍花槍，反而更得網友歡心，當係綜藝咁睇。唔經唔覺，今日（7日）係內地高考日子，同時亦係佢哋結婚14年紀念日，唔少網友都留言戲稱莘莘學子「艱苦」嘅日子，係佢哋晒恩愛嘅日子，即係佢哋已經見證咗14屆高考。

鄧超上載多張孫儷舊訪問截圖，內容都係孫儷大讚鄧超點樣令自己幸福嘅言論，又cap低網友留言「孫儷是世界上忍耐性最強的女人」嘅彈幕截圖，去賀14周年快樂。而孫儷就擺上二人合照，同晒出結婚證，留言：「2010到2024，兩人持證上崗到今天已有14年」另類放閃。