E奶奎丁接眼睫毛遭細菌感染　靚樣變豬頭

台灣「豪乳女神」奎丁（Zamy）有着E Cup玲瓏浮凸身材，不時喺社交網賣大包派福利嘅佢，日前拍片透露喺今年2月初某個晚上感到臉部疼痛，起身發現臉部腫脹，情急之下立即去藥房買消炎藥、止痛藥食，可惜情況未有好轉，嚇到奎丁即刻去睇急診，經過診斷被認為只係過敏反應，打完過敏針就叫佢返屋企休息。

未料，事隔2日反奎丁臉部開始嚴重腫脹，眼袋位置更變成兩個「巨大水泡」，令佢忍唔住直呼：「我當下真的不知道該怎麼辦，我覺得毀了！」於是再去睇醫生嘅佢，亦被醫生診斷為蜂窩性組織炎，經過住院治療及打咗3次抗生素，經過流膿處理後總算成功康復出院，但以為終於順利根治嘅奎丁，3月31日又再度復發。之後經過連續數日抗生素治療嘅奎丁，鼻樑亦不幸因此變形，需要手術清創重建嘅佢，亦用自己嘅肋骨重建鼻樑之餘，就連之前嘅呼吸問題都一次過處理埋，對於是次不幸，奎丁認為係自己本身免疫力差嘅同時，可能係接假睫毛時受到細菌感染入侵。