星玄｜炎明熹戰鬥格騷身材　網民激讚：盜墓者Gigi

今日係6月8日農曆五月初三，幸運星係白羊座，得到好運氣加持，宜抓住時機為理想奮鬥。白羊女炎明熹（Gigi）自出道以來，歌唱事業可謂愈唱愈好，唔單止開個人演唱會，又推出人生首張7吋45轉黑膠唱片，早前更喺社交網上載唱歌片，吸引到唔少樂迷留言大讚話好聽，仲話條片太短唔夠喉，Gigi你得到好運氣加持，不如再同公司反映下，睇吓可唔可以再開個唱，等樂迷可以大飽耳福呀嘛。

而近年形象多變嘅Gigi，日前喺社交網上載自己去錄音嘅相及短片，見佢頭紮大孖辮，配上齊陰，加埋件黑色緊身小背心，仲要露出小蠻腰，唔少人都大讚佢個造型似盜墓者羅拉。

至於肖豬嘅朋友，貴人助力強，做事重細節，不難成功。肖豬嘅陳豪（Ｍoses）無論喺演藝事業，定抑或副業都十分出色，雖然最近忙於拍劇，但都不忘為自己代言嘅產品做宣傳，仲話表示：「剛剛完成乳酪商業活動，今天大清早便收到太太親手製作的乳酪早餐，『甜味』盡在不言中」，Ｍoses你咁識做，好難唔成功喎。