劉亦菲新劇兩集咀15次　轉玩SheShe CP殺出重圍

有「神仙姐姐」美譽嘅內地花旦劉亦菲主演新劇《玫瑰的故事》剛開播幾日，收視與熱度雙雙登頂，有關新劇嘅熱搜日日都好幾條，明顯係萬眾矚目。有網友就發現新劇僅兩集時間，劉亦菲就已經同男主角彭冠英咀足15次，扮演初戀嘅二人成日黐到實，令粉絲都話好妒忌彭冠英可以同女神又攬又錫，「#劉亦菲彭冠英2集親了15次#」話題更有1.2億閱讀量，數字驚人。

不過二人熱度幾高都好，忽然網上就殺出劇中新CP組合，更係由劉亦菲、萬茜及朱珠三人組成嘅「SheShe CP」，熱搜排名更勝男女主角咀嘴！原來網友係將劉亦菲劇中同上司、同事嘅Office line當做CP，當中黃亦玫（劉亦菲飾）同蘇更生（萬茜飾）嘅CP名叫「玫瑰酥」，三人CP名就叫「亦萬頭珠」，網友另類「磕CP」令人哭笑不得。