芯駖@COLLAR單飛出歌 「芯門大開」勁養眼
2024年06月11日 18:01
東網電視
更多新聞短片
![](/hk/bkn/cnt/entertainment/20240611/photo/bkn-20240611180139589-0611_00862_001_01p.jpg?20240611180139)
女子組合COLLAR繼Marf、Winka「單飛」後,成員芯駖昨日亦推出首支個人單曲《SPYLING》,曲風以擅長的跳唱快歌為主,再配上間諜故事為題,而拍攝MV期間,芯駖以性感的間諜造型上陣,大騷香肩之餘,更真空示人,就連她亦笑言是「芯門大開」,她說:「一聽首歌嘅Demo就想起《職業特工隊》湯告魯斯倒吊個畫面,於是我同填詞人傾,好奇妙佢都有同感,而且佢諗起一本書《像間諜一樣思考》好襯呢首歌,於是用咗呢個題材發展今次首歌,我又將自己好多想法都交畀MV導演,最開心今次MV加入我最喜歡嘅黑白元素,所以好期待。」
提到MV造型大開中門非常性感,芯駖自言早有心理準備:「知道MV以間諜為主題,造型師早就同我講啲衫一定好貼身,叫我有心理準備,我知道後亦第一時間去每日都做體能訓練、游水、跑步、踩單車,加上食清淡啲,令自己瘦身啲同弗少少。」更指首次出歌心情既緊張又興奮,不過當抵達MV拍攝現場時,心情反而比想像中放鬆:「之前7個人拍MV都咁辛苦,我好驚一個人拍會好辛苦,加上冇隊友喺身邊,起初都有啲擔心,但嚟到見到所有安排都準備得好好,反而心情放鬆咗!」
獲悉首次「單飛」出歌,芯駖竟不敢第一時間跟媽媽分享消息:「驚佢擔心,所以專心做好先,作品完成後會同佢講,但會畀心理準備佢,會有好突出造型。反而第一個問我係咪出歌嘅人係Day(許軼),佢仲問我可唔可以聽吓首歌,佢聽完話好好聽,仲問我可唔可以畀個MV佢睇,我話拍咗先再畀佢;其實我未出歌時,Marf都成日send好多歌畀我,話覺得邊首歌啱我,所以出歌我都問大家意見,因為我有選擇困難症。」