與郭富城個唱門票同日開賣　AK越級挑機趴地谷飛

男團MIRROR副隊長Anson Kong （AK）首個個人演唱會將於下月舉行，門票昨日開賣，卻撞正天王郭富城8月紅館騷同日賣飛，AK要出絕招落力谷飛！反觀「舞台王者」城城叫座力驚人，輕鬆偕家人出海。

「舞台王者」郭富城（Aaron）8月紅館騷門票昨日開賣，他於籌備個唱前先與家人出海鬆一鬆， 享受天倫樂。其愛妻方媛日前分享全家出海的照片，兩名囡囡戴上墨鏡精靈可愛， 方媛則坐在遊艇梳化上大晒長腿， 時尚感十足， 可見A a r o n應付個唱游刃有餘，而演唱會更掀起搶飛潮。

氹氹轉玩問答

而AK將於7月29日舉行的處男個唱，門票同樣於昨日開賣，雖然只開一場，但由於越級向城城隔空挑機，AK嚴陣以待，大力宣傳，前日他分享短片「吸客」，提醒粉絲準時買飛。片中他捉着工作人員不停氹氹轉，期間工作人員邊轉邊問有哪幾位MIRROR 成員是7 月壽星時， 他立即答出Anson Lo 及Frankie，但就數漏了Tiger。最後問到演唱會有幾多位嘉賓？他大賣關子：「呢個時候問我，我唔答你。」答完所有問題後，AK轉到暈，趴在地上搞笑擺出作嘔狀，仍不忘大嗌賣廣告：「賣飛啦！賣飛啦！」網民見他賣力谷飛，大嘆搵食艱難。