鮮娛糧｜潘明璇街訪自爆　愛丁子朗想嫁王嘉爾

落選港姐潘明璇參賽時獲封「火辣學霸」，加上佢人靚身材正，高IQ且識搵錢，依家再升level做「絕世好package」，日前佢就被截停做街訪，仲大談佢嘅揀偶條件，原來佢最愛同公司嘅小生丁子朗，更想搵王嘉爾（Jackson）做老公！

潘明璇被問到喜歡邊一位男星時，佢即衝口而出表示：「我鍾意TVB嗰啲。」更直言最like丁子朗：「不過佢唔係拍戲，係唱歌㗎。（鍾意佢啲咩？）我哋同一間公司㗎。」之後主持人拎出劉俊謙張相，潘明璇僅表示「幾有型」，又坦言自己愛有腹肌嘅男士：「我鍾意有腹肌，鍾意做GYM，我自己都係做GYM。」之後主持人再叫佢喺姜濤、劉俊謙同Jackson之間揀男友同老公時，潘明璇就失言問姜濤係「好肥嗰個」，之後佢再表示揀劉俊謙做男友，老公就揀Jackson：「Jackson Wang好似好乖，形象係好老公。呢個（劉俊謙）就好似好玩啲。」女神口味大家清楚晒。