與林鈺洧成為密友　馬清揚認嗌對方泊名車入屋苑

前港姐冠軍林鈺洧（Denice）被東網獨家踢爆佢同錢慧儀前夫馬清揚成為密友，更不時駕名貴跑車進出男方位於山頂嘅豪宅，關係匪淺。近日二人再被爆料，指兩人每星期有數日均會喺中環撐枱腳。馬清揚就事件作出回應，直言自己現時單身，同Denice有來往實屬正常，希望可以畀啲空間女方。

佢直認自己同Denice喺唔同慈善場合認識，大讚對方係一個好好同純品嘅「細路女」，依家女方以事業為重，佢自己亦係單身，二人來往實屬正常。對於東網拍得Denice駕名貴跑車進出自己山頂豪宅，佢指係因為嗰晚有慈善活動慶功宴，不過宴會上飲完酒不適宜駕駛，所以馬清揚先叫司機將Denice架車停泊喺屋苑，等Denice隔日拎返。