娜扎公然解鎖男星電話Lock　自揭兩人秘密關係

新疆美女娜扎貴為圈中大美女，大家都好關心佢嘅感情生活，去年誤撻內地小生徐開騁，更無辜「被小三」，好在佢急急斬纜洗污名，避過一劫。但之後佢嘅愛情世界就一直未有聲氣，點知近日佢現身綜藝節目《旅行任意門》時，就自己揭發同搞笑男星楊迪有「隱藏秘密」。

節目中，楊迪拎出手機嗌娜扎幫手影相，點知娜扎拎起電話撳幾撳，竟然就解咗鎖，令楊迪一臉驚慌、大惑不解。楊迪狂追問佢係點unlock，出名反應快嘅佢，即笑言一定係佢哋兩個生得太似樣，連電話都誤當咗娜扎係自己，場面非常爆笑。不過有網友估計係楊迪拎手機出嚟時按到指紋解鎖，自動解鎖咗，所以交到娜扎手時，就以為係娜扎解鎖。