支嚳儀再推新歌派正能量　感激老公批評

《中年好聲音》歌手支嚳儀繼首支單曲《Gotta Try》後，第二首歌正在密鑼緊鼓籌備中，預計年底推出，她透露自己的定位是賦予歡樂，新歌旋律輕快，正是朝這方向走。她與周吉佩、李佳、羅啟豪和龍婷等一同參與的《「十」力無限演唱會》，花了好長時間排練，她已計劃完騷後，便會由歌手變回媽媽和老婆角色，偕兒子和老公飛日本放假，「放假我會全部時間畀曬屋企人，嗰排日日排練，老公每日問我最多嘅係：『今晚返唔返嚟食飯？』，角色好大轉變，我覺得幸福好簡單，佢留塊Pizza畀我就好開心，有屋企呢個情緒支柱，對藝人好緊要，屋企係我嘅加油站。」支嚳儀指老公經常會提點她，令她有好安心感覺：「佢嘅提醒，可以將我拉番去現實，例如佢會話如果啲歌無人聽呢，我好需要呢啲醒覺，畀到一個心情準備我，所以大家千祈唔好覺得伴侶批評就係代表唔撐你。」