陳懿德羅天宇各有各忙冇約會　鄧凱文恨入《愛•回家》

無綫藝人陳懿德（德德）偕鄧凱文（Eris）出席三文治新店開幕活動。前者露長腿，後者則穿低胸露背裙亮相，各具美態。參加2021年度港姐競選的德德，表示有留意今年面試參選者，大讚：「好犀利，個個質素好高，好彩我唔係今年參選，依家已經出道，其實參選係開拓自己嘅大門，可以大開眼界。」

她又說近期工作忙，除要備戰《福祿壽訓練學院》終極對決外，又將投入奧運工作，問到可有跟緋聞男友羅天宇見面？德德大發嬌嗔謂：「係好朋友，近期各有各忙，見面都係同成班朋友，最近一次見係喺樂小姐（樂易玲）生日會，（有冇私下兩個人見？）冇啦，佢聽聞又要拍劇《金式森林》，或者約佢嚟呢度食炸，但又冇堂食喎，只能外賣。」

而Eris就話繼續忙綜合資訊節目的記者工作，亦想嘗試拍劇，她說：「好想加入《愛•回家》劇組，因為我有追劇，覺得個劇好溫暖，但都要等公司安排。」而德德也恨入《愛》劇，表示：「我喺英國讀書時都追緊呢個劇。」