吳奇隆被嘲身形脹爆兼跌Watt　激罕Po相反擊

台灣藝人吳奇隆同內地頂流小花劉詩詩結婚多年，育有1子「步步」嘅佢哋，卻不時傳出婚變傳聞，不過向來懶理謠言嘅佢哋，亦依舊保持低調生活。然而，因老婆劉詩詩係內地頂流花旦之一，令吳奇隆嘅一舉一動亦備受關注，甚至經常會因發福、顏值跌Watt登上熱搜，而日前內地社交網亦再流出數張佢出席公開活動，未經修圖嘅照片，只見身穿黑T襯長褲，戴上黑框眼鏡嘅佢，即使黑衫打扮依然難掩脹爆身材，引嚟唔少網友批評道：「哥怎變這樣。」、「確定是吳奇隆嗎？」、「愈來愈不自信了，上個台很拘束。」

不過，亦有網友為吳奇隆解畫，質疑呢一輯發福相係舊相，並不是佢依家嘅真實狀態外，更有網友透露早前喺街上巧遇到吳奇隆，發現對方狀態保養得宜，皮膚狀態更絲毫睇唔出53歲，而對於自己身材再掀熱議嘅吳奇隆，亦難得喺社交網晒出3張相道：「今天長這樣。」間接粉碎發福傳聞。