鮮娛糧︱羅志祥出師不利MV被指過分暴力　險下架急打格仔

「亞洲舞王」羅志祥（小豬）最近推出新歌《舞狀元》MV，暌違5年出新歌，成為佢出道以來第13張專輯，MV前日（25日）以古裝大片形式上線，小豬不僅相隔25年再次着古裝，武打動作更親自上陣。未料MV先上架1日，佢就突然發文透露，因為畫面太暴力遭到關切。

羅志祥新歌《舞狀元》MV於25日上線，佢尋日上載限時動態透露：「竟然收到公司通知〈舞狀元〉MV太暴力，畫面被關切，經過搶救只能打馬賽克處理了，你們有發現嗎？」只見MV中，多個手持武器、血腥畫面，都被打上格仔，特別處理。

其實今次MV由羅志祥落足力大搞，除本人擔任編劇及親自上陣武打動作，佢仲請埋荷里活電影《狂野時速》中以角色「韓哥」走紅嘅姜成鎬飛台灣，為武術團隊特訓，係心血結晶。